Lidernan politico awe a reuni cu mando di Cuerpo Policial riba e reglanan pa loke ta e campaña politico. E reunion a tuma luga na John F. Kennedy Education Center.
E prome pa sali tabata líder di HTC, Gilbert Webb, kende a expresa su disgusto pasobra tur cos ta faborece e partidonan grandi. Practicamente tur cos mester tuma luga di forma virtual, locual no ta permiti HTC bay den bario, bishitando e ciudadanonan cas pa cas.
El a haci un apelación na pueblo di Aruba pa haci un cambio y firma nan lista dia 10 di mei pa nan por participa den eleccion. “Partido HTC no kier gaña pueblo, kier caba cu corrupcion y kita e partidonan tradicional. Awo cos ta manera un dictadura completo y cos ta bay manera e partidonan grandi kier.”
No solamente Webb pero expresa cu e ta comprende e informacion y preocupacion di DVG cu e variante Britanico ta un 85% di e casonan di contagio na Aruba.
Di otro banda, e ta fastioso pa hiba un campaña cu e reglanan poni. E comision a bisa cu lo forma riba un base frecuente cu e partidonan pa informa kico por y kico no por den e pandemia cu tin. Tur cos mester bay basa riba cuido di salud di cada ciudadano. DVG a duna ehempel di situacionnan cu a surgi na otro parti di mundo den pandemia y cu eleccion. Pero AVP lo respet reglanan.
Na mesun momento Candelaria a haci un apelacion na henter pueblo pa vacuna, pa e economia por lanta bek y protege bo mes, famia y amigonan.
Pa MEP tabata presente e presidente di e partido Hendrik Tevreden, kende a cataloga e reunion como uno hopi bon y den bon ambiente. A haya algun informacion alarmante, manera e brote masal cu a tuma luga na Corsou husto durante e temporada di eleccion. Tevreden a bisa cu como partido kier gana eleccion, pero no kier perde mas bida. Nan tin un programa basa riba e situacion actual, pa cual e no ta kere cu ta oportuno pa kibra e trabou haci door di gobierno. E ta apela pa mantene siguridad di pais, uzando formanan nobo di campaña. El a señala e situacion na Corsou unda e pais a crash despues di eleccion y hasta Aruba mester a ricibi pashent di e isla.