Hour of Code ta un plataforma mundial na unda cu mas di 180 pais rond di mundo ta participa. Miles di mucha y hoben rond di mundo ta bini hunto pa un ora den e di dos siman di december pa siña “coding” na un manera creativo y placentero. Prome Minister Evelyn Wever-Croes ta encurasha mayornan, companianan, scolnan, centronan di bario, y tur plataforma di educacion, sector priva, pa participa na Hour of Code.
E aña aki, Aruba tambe ta participa na Hour of Code. Hour of Code ta habri pa tur hende y di tur edad. Lo tin si un enfoke special pa muchanan di klas 5 y 6 di scol basico y tambe klas 1 of brugklas di scolnan secundario. Pero e berdad ta cu tur mucha, hoben of persona cu tin un computer, tablet of laptop y cu acceso na internet, por participa gratis.
E proposito di Hour of Code ta pa nos yuda nos muchanan y tambe maestronan pa trece sciencia y tecnologia, y tambe coding mas cerca di nos muchanan den un manera innovativo cu ya caba nan ta custumbra cu n’e, por ehempel, via weganan y topiconan manera Star Wars, Minecraft, Frozen, y Angry Birds.
E Ekipo di innovacion di Gobierno, Futura Lab, hunto cu diferente stakeholders manera Universidad di Aruba, Departamento di Enseñansa, y Setar entre otro, a forma un grupo di trabou pa yuda organisa e voluntarionan pa haci Hour of Code posibel e aña aki. Pero ta keda na cada scol of compania pa organisa nan mesun evento e mesun dia y mesun ora.
E grupo di trabou lo duna tur informacion necesario pa esnan interesa por organisa nan mesun Hour of Code. E meta ta pa mas cu 1500 mucha y persona participa den Hour of Code na Aruba e aña aki y pa tur aña e grupo keda bira mas grandi pa nos por alcansa tur scol y tur bario di Aruba.
Hour of Code e aña aki lo ta e siman di 3 pa 7 di december y durante siman aki lo publica informacionnan di con por inscribi pa participa of bira un voluntario pa Hour of Code.
Por sigui e pagina di Facebook di Futura pa obtene mas informacion. Tambe e website di Departamento di Enseñanza y e APP di Gobierno lo publica tur informacion di con por participa.
Prome Minister Evelyn Wever-Croes ta invita tur esnan cu tin pasion of afinidad cu sciencia y tecnolgia y innovacion, maestronan rond di Aruba, entrepreneurnan, NGOs, centronan di bario y tambe sector priva pa participa den Hour of Code pa asina hunto nos yuda hisa e capacidad di innovacion di nos mucha y hobennan.
Sector priva tambe por yuda door di duna nan empleadonan un paar di ora pa asina nan tambe por ta un boluntario, of un compania por adopta un klas di un scol pa un ora, of por yuda cu fia laptops y tablets pa e siman aki na scolnan of na fundacionnan cu kier organisa un Hour of Code, of kizas un compania por organisa un Hour of Code na nan oficina mes.
Hour Code ta solamente un ora so, e no ta costa nada y e ta habri pa tur hende. Por lo tanto, Prome Minister ta encurasha tur scol y plataformanan di educacion y huventud, y tambe sector priva haci uzo di e oportunidad aki pa yuda acelera innovacion y trece sciencia y tecnologianan mas cerca di nos muchanan y hobennan.
Prome Minister a gradici Minister di Enseñansa Armando Rudy Lampe pa su apoyo pa cu e proyecto aki y e compromiso na nos muchanan pa innova den enseñansa.