Den e cuadro di e siman di Hour of Code, Minister di Enseñansa, Ciencia y Desaroyo Sostenibel sr. dr. Armando “Rudy” Lampe a bishita Emma School na Ayo. Den un “Smart Classroom”, Minister Lampe a hiba palabra na e alumnonan y a curasha nan participacion na e bunita proyecto di nivel mundial. E mensahe di e Minister na e muchanan tabata pa nan siña topiconan, informacion y strategia educacional nobo hungando weganan educativo usando e tablets.
“E Hour of Code ta pa laga boso experiencia y asina descubri con fasil y dibertido ta pa instrui e computer kico pa e haci y cu un y tur por. Tambe ta importante pa e ser humano na Aruba desaroya su mes pa e bon funcionamento den e futuro sociedad unda computer su rol ta bay ta inmenso”, e Mandatario di Educacion splica.
Minister Lampe a keda contento di mira e motivacion di e almunonan, cla pa cuminsa cu e proyecto.
Sr. Hubert Franken, den nomber di e alumnonan y e personal di Emma School, a entrega Minister Lampe un certificado oficial di “Hour of Code” como gratitud pa Minister su bishita y pa duna inicio na e prome grupo di alumno participantente di Emma School.
Durante e Hour of Code mes, por a experencia con e alumnonan tabata pratica individualmente y despues den grupo di 2 of 3 colaborando asina pa nan yega na e solucion desea. Un les sigur educativo y innovativo pa Emma School su alumnonan, unda no solamente nan a practica pa duna instruccion na e programa digital, pero tambe hopi mas importante practica nan concentracion, pasenshi y promoviendo colaboracion.