Un compleho di hotel luhoso den e capital di Kenia a wordo ataca cu explosionnan y un tiroteo formal. E grupo extremista “Al Shabab”, cu su sede na Somalia, a tuma e responsabilidad y a bisa cu su miembronan ta sigui bringa den e zona. Testigonan y polis na e luga di hechonan a describi e atake terorista aki como un di esnan mas teribel di ultimo añanan. E atake a sosode den e vecindario di Westlands, caminda e hotel luhoso DusitD2 y varios banco y oficinanan ta ubica. Varios vehiculo a rementa y hopi hende a wordo evacua di e luga. E tiroteo a dura varios minuut mientras cu huma reto tabata bai halto den shelo. “Nos a manda varios agente y hasta e unidad anti-terorista pa e luga”, asina e vocero policial Charles Owino a declara. Un grupo grandi di hende muhe a wordo evacua di e luga dor di forzanan di seguridad. Mientras cu otro gruponan di hende tabata wordo saca poco poco y di luga pa luga. Un agente policial di Kenia tabata un di e promenan cu a jega n’e luga di atake. “No tabatin tempo pa conta morto, pero mester wak prome si di berdad tin hopi hende morto”, asina e agente a duna di conoce. E agente a bisa cu tabatin curpanan benta tur caminda den restaurantnan abao y tambe den varios di e oficinanan. E agente a bisa cu tabatin sanger y glas tur caminda y mientrastanto por scucha tironan.