Debi na e entusiasmo grandi y conocemento cu ya tabatin den cas Dr. Horacio E. Oduber Hospitaal a logra completa un trayectorio di training di 60 di su nursenan, como tambe a crea trainernan local cu ta traha pa hospital, den un tempo hopi mas cortico cu a anticipa ora a cuminsa cu e proyecto, segun Margreet van de Meyde.
Van den Meyde ta vice dekaan di Vrije Universiteit Medische Centrum Amsterdam (VUMC Amsterdam), cu for di aña 2010 tin un acuerdo di cooperacion riba diferente tema cu hospital. E acuerdo aki a wordo renoba na 2015 y ta encera, ademas di mehoracion di cuido di calidad y enseñansa, e temanan intercambio di personal y studiante, incluyendo esunnan cu ta bin como “co-assistenten” Aruba, “bij- en nascholing”, y apoyo cu investigacion cientifico.
Director encarga cu cuido di pashent na hospital, esta sr. Ezzard Cilié a expresa cu hospital no ta haci anuncionan frecuentemente tocante di educacion, pero cu esaki ta un momento special, unda cu e cera un etapa basta importante di un aña den cual tabata bezig ta eleva e calidad di educacion. A traha cu docentenan di VUMC y ta prepara pa hospital sigui padilanti pa e siguiente reto. E ta un ocasion festivo pa hospital.
Fuera di e opleiding cu ta wordo ofreci na Colegio EPI, hospital mes ta ofrece hopi training y opleiding di specialisacion na su personal, Cilié a comenta, y den e proyecto aki a inclui preparacion di docentenan pa sigui cu e trabao di siña studiantenan y empleadonan con pa mehora den nan profesion.
Ezzard Cilié na e ocasion aki a anuncia tambe cu Minister di enseñansa a aproba pa EPI sigui cu e trayecto nobo, cual ta un opleiding di enfermeria diferente na esun anterior, unda cu a traha riba mehoracion di calidad y a agrega hopi practica pa asina e studiante/graduado ta riba un otro nivel pa pas miho den e area di trabao.
Van de Meyde a bisa cu e trayectorio cu a wordo completa tabata un opleiding hopi grandi, cu a inclui 60 studiante cu a caba e curso cu exito, trahando riba nan “kennisvaardigheden” manera nan ta prescribi den ley. A inclui tambe trainingvaardigheden pa asina Aruba tin su mesun hendenan cu ta haci “assessment” y examennan. Esaki ta un stap grandi pa hospital y ta haci posibel pa nan establece nan mesun vakschool pa enseñansa specialisa, Van de Meyde a conclui bisando.