Awe den oranan di marduga un biaha mas hospital a keda afecta pa e trabou defectuoso haci riba e proyecto di renobacion y ampliacion. E biaha’ki tabata un tubo di awa cayente cu a leak (rementa) causando un inundacion y empleadonan herida.
E edificio bieu di hospital cu a caba di wordo renoba a lanta manera un pool. Despues di inversion di casi 1 biyon florin. E biaha’ki e problema tabata den e edificio bieu cu a caba di wordo renoba. Informacion cu MasNoticia a ricibi ta cu e tuberia a kibra.
Hospital mes a saca un memo pa empleadonan unda ta informa nan kico a pasa den e edificio bieu cu, nan ta bisa, no ta den uzo ainda.
Tabata durante un control di guardianan di siguridad den oranan di ayera nochicu a bin descubri e inundacion y steam cayente den aire na piso 3 di Toren A. Segun nan ta splica cu ta trata di un area cu no ta den uzo ainda.
A splica cu e parti di distribucion di awa cayente cu ta bay pa e sistema di tratamento di aire a kibra. Esaki ta motibo cu e awa na vloer tabata cayente.
No solamente esey, a resulta cu dos empleado a resulta herida y emergencia a trata nan. Un di nan a sinti e efecto di steam na su wowonan y e otro a haya kimaduranan di segundo grado na su pia.
No ta prome biaha hospital ta confronta problema cu tuberianan of otro sistemanan ta kibra of daña afectando operacion di e unico instituto hospitalario cu Aruba tin. Mas ainda un instituto unda cu a hinca miyones y miyones florin cu no solamente e generacion aki ta paga p’e pero e siguiente tambe. N abuso cu placa di pueblo y un proyecto cu te dia di awe no por bisa cu e no ta duna dolor di cabes.