Recientemente e departamento di higiena y prevencion di infeccion di Dr. Horacio E. Oduber Hospitaal a organisa un siman dedica na “handhygiene”, esta higiena di man. Durante di e siman aki a enfoca riba e forma corecto y e importancia di labamento di man pa cu higiena general, y particularmente pa cu prevencion di enfermedad of traspaso di enfermedadnan y bacterianan.
Sra. Rica Delamarre a subraya cu particularmente den e temporada di griep ta extra importante pa tur persona corda y enfoca riba labamento di man pa asina preveni e transmision di griep.
Semper corda laba man ora cu yega cas bek prome cu haci cualkier otro cos den cas mirando cu durante dia a mishi cu hopi superficie unda tin bacteria.
Sra. Rica Delamarre hunto cu comision di higiena di man consistiendo di diferente disciplina di HOH a traha incansablemente pa organisa e actividadnan relaciona cu e topico aki. A busca pa conscientisa tur grupo di interes, pues cuminsando cu e personal di hospital den su totalidad, pero tambe pashentnan, bishitantenan, y comunidad di Aruba.
E campaña a consisti di un apertura na unda hopi colega tabata presente pa hunto start e siman importante aki. A hiba palabra sr. Ezzard Cilié di Hunta di Directiva, tambe internista sra. Karina Kelly y a presenta un video cortico tocante higiena di man. Tambe a tuma luga e prome les di aña 2016 di higiena di man na e team di Hunta di Directiva, Cluster – y tambe zorgmanagers di HOH. Durante e siguiente simannan tur empleado mester inscribi pa nan sigui e les importante aki. Tambe a traha posters sumamente creativo cu diferente “ slogans” pa capta atencion di pashent y tambe bishitante. E idea tras di e campaña sigur ta pa promove e proceso pa laba man corectamente bao di tur empleado teniendo semper e pashent den mente.
Ademas a bishita diferente medionan di comunicacion pa curasha comunidad pa cu limpiesa di man.
A promove bao bishitantenan di hospital pa laba man pa medio di uzo di habon of haciendo uzo di “handsanitizer” prome y despues cu bishita un pashent of cualkier departamento di hospital. A inclui tambe e “test” di limpiesa di man pa medio di uzo di un luz special pa laga bishitantenan wak con limpi nan mannan ta. E test aki, cu un “luz biña” a tuma luga na un mesa na entrada di hospital. Tur bishitante cu a participa tabata sigur impresiona cu e actividad aki cu na final di nan participacion a ricibi un “handsanitizer” di Hospital regalo.
Den un institucion di cuido labamento di man corecto ta esencial, tanto pa e personal como pa e bishitantenan.