Prome cu aña 2006 muchanan cu nace cu of desaroya un condicion na nan curason tabata wordo manda pa centronan specialisa den exterior pa un evaluacion di nan condicion. Cu yegada bek na Corsou di dr. Shirley Lo-A-Nioe despues cu el a caba su estudio den cardiologia pediatrico na Hulanda, e specialistanan di mucha na Aruba a mira un oportunidad pa haya sosten mas cerca di cas y hunto cu AZV, Dr. Horacio E. Oduber Hospitaal a logra atrae e specialista pa atende pashentnan 2 pa 3 biaha pa luna na Aruba. E prome “spreekuur” a tuma luga dia 17 di November, 2006. Pues siman pasa Dr. Horacio E. Oduber Hospitaal, e team di pediatranan y e departamento di mucha a conmemora 10 aña desde a cuminsa duna consulta na Aruba pa mucha cu problema di curason.
E departamento di mucha di Hospital ta cuida pashentnan di 0 pa 14 aña. Nan ta contento di por conta cu e oportunidad di tin un cardiologo di mucha di Corsou kende ta traha hunto cu pediatra Dr. Eric Arends como liaison y e otro pediatranan, como un team di sosten pa e pashentnan di Aruba cu nace cu un complicacion of a desaroya un condicion di curason.
Pediatra Dr. Eric Arends a subraya cu e consulta di cardiologo di mucha ta un desaroyo hopi positivo, como cu prome cu tabatin e posibilidad aki tur baby y mucha pa kende tabata existi un duda encuanto di su condicion tabata wordo manda pa specialistanan den exterior pa un chekeo y diagnostico.
E situacion aki tabata fastioso pa e mayornan, y tabata trece gastonan extra pa e mayornan y e sistema di cuido. E consultanan na Aruba ta haci e proceso di chekeo hopi mas facil.
Dr. Arends a splica cu for di aña 2006 e pediatranan di Aruba ta samina e pashent prome y ta cuminsa cu e proceso di pidi diferente test. E pediatra ta discuti e caso cu e kindercardioloog y ta verwijs e pashent pa e cardiologo kende ta manda e pashent pa mas test manera echocardiogram y/of si e pashent tin entre otro dolor na pecho of ta sinti hartklop e ta haya un “ergometrie”, “inspanningstest” (test di esfuerso). E testnan aki ta wordo haci na Aruba mes.
Dr. Arends ta agrega cu testnan manera catheterisatie y tratamento manera cirugia, ta wordo haci den exterior, pero un gran parti di e screening ta tuma luga convinientemente na Aruba mes. Den e prome seis luna di aña, ya a manda 6 pashent den exterior pa operacion, a monitor e otro pashentnan y/of trata nan aki mes, bao guia di e cardiologo.
Dr. Eric Arends a splica cu for di e embaraso caba e cardiologo pediatra y pediatranan ta traha hunto cu e ginecologo ora cu cualkier caso presenta. E echo di e baby ta wordo haci pa e ginecologo hunto cu dr. Arends y dr. Lo-A-Nioe. Si e “afwijking” ta grandi ta dicidi di manda e mama pa un centro specialisa den exterior unda cu e ta completa su embaraso y haya su yiu.
Otro pashentnan ta wordo detecta pa e pediatra asina cu a baby nace of durante di chekeonan na e dokter di cas of Wit Gele Kruis. Tin pashentnan di tur edad, entre 0 pa 14 aña cu ta presenta cu condicionnan cu sea nan a nace cune y nan a manifesta den e desaroyo di e hoben, of nan a desaroya cu tempo.
Durante di e seminario, dr. Lo-A-Nioe, y dr. Eric Arends a duna presentacionnan hopi informativo. A papia di e casonan cu ta presenta na Aruba, di cua condicionnan a mira un aumento y den ki area tin un reduccion, kico ta e factornan cu mester tene cuenta cun’e ora ta observa un pashent of posibel complicacion y kico ta elementonan importante y sintomanan cu ta indica un posibel condicion di curason pa tene cuenta cun’e. A elabora tambe riba e “Ziekte van Kawasaki”, cu ta un enfermedad cu por tin influencia riba e funcionamento di e curason.
E specialistanan a duna splicacion tambe di sintomanan cu dokternan di cas mester tene cuenta cun’e, tanto cerca e pashentnan mas chikito, como e muchanan un poco mas grandi. Tin sintomanan cu no ta wordo reconoci, pues ta importante pa e dokternan di cas tin atencion special pa e sintomanan aki tambe. “Basale lichamelijke onderzoek”, o sea e chekeo medico basico, a wordo splica den detaye. Esaki ta resulta den informacion importante pa analisa kico exactamente ta pasando.