Anualmente Horacio Oduber Hospital Hospital (HOH) ta hasi un analis di bishitantenan cu a acudi na departamento di Emergencia durante e weekend di Pasco. Na prome lugar HOH kier gradici full e team cu a traha incansablemente durante weekend di Pasco. Un fin di siman unda cada colega a traha duro pa asina atende tur pashent cu a yega cu un of otro problema medico. E aña aki tabatin un aumento drastico compara cu e añanan anterior, esta 27% mas a acudi cu aña pasa. Un total di 404 pashent a acudi pa sea ricibi atencion medico na Departamento di Emergencia of dokter na warda. Aña pasa tabata 319 persona, na aña 2020 tabatin 284 persona y na 2019 esaki tabata un total di 332 persona.
E analisis a cuminsa dia 24 di december pa 6am y a termina dia 27 di december pa 6 am. Di e 404 persona un total di 143 persona a ricibi atencion medico na departamento di Emergencia cual ta un aumento di 26,5% compara cu aña pasa. Di e 143 pashentnan cu departamento di Emergencia a atende 57% ta masculino. E edad di mas chikito cu a atende e aña aki ta un baby di 9 siman y e pashent di mas grandi 104 aña. Y alabes e edad averahe cu a ser atendi tabata 41,6 aña di edad.
Ta interesante tambe pa analisa e motibo di bishita durante e fin di siman di Pasco. Di e 143 pashentnan cu a acudi na Departamento di Emergencia 49 tabatin un of otro lesion di cual 7 tabata involucra den un accident di trafico, 1 persona den incidente di violencia y 41 persona cu otro tipo di trauma. E otro pashentnan cu a acudi tabata pa dolor na pecho, dolor di stoma, infeccion, falta rosea etc.
Di e 143 pashentnan cu a acudi na Departamento di Emergencia un total di 37 pashent a ser admiti den Hospital y 105 pashent por a regresa cas. Alabes mester bisa tambe cu 54% di pashent admiti ta femenino.
Hospital kier pidi tur hende pa bay poco poco e ultimo siman di 2022. Cuida bo mes y bo salud y corda cu bo tin un famia cu ta stimabo ta wardabo na cas. Y si encaso bo mester di asistencia medico corda tambe cu nos di HOH semper t’ey!