Recientemente Hunta di Directiva di Dr. Horacio E. Oduber Hospitaal conhuntamente cu e comision di proyecto Hyperbaric Oxygen Therapy (HBOT) a duna un presentacion dilanti di e delegacion oficial di Parlamento di Aruba en conexion cu e deseo di adkiri un tanki di presion pa Hospital. Un unidad di oxigeno hiperbarico ya no ta indispensabel na Aruba mirando cu ta construyendo un Hospital nobo y alabes teniendo na cuenta e parti di turismo cu ta bin Aruba pa duik. Hospital ta hopi contento di por a conta cu e interes grandi expresa pa e delegacion cu ta para completamente tras di e deseo aki.
Tratamento cu oxigeno hiperbarico ta un tratamento medico unda cu pashent ta wordo hinca den un camber special bou di un cierto presion. Nan lo ricibi 100% di oxigeno pa asina e curpa por tuma 10 pa 15 bes mas oxigeno cu normal. Esaki ta sumamente importante pa personanan cu ta duik cu a haya un malesa conoci como “decompressieziekte”. Esaki ta nifica un persona cu despues di a wordo exponi por ehempel pa motibo di trabou na un grado di oxigeno hopi halto, lo mester regresa den un ambiente di oxigeno cu presion abou. Den un caso asina nan mester wordo poni bou di presion, ricibi 100% di oxigeno y poco poco kita bek for di e presion pa asina regularisa esaki.
E terapia aki tambe ta hopi bentahoso pa pashent cu herida. Door di duna oxigeno bou di presion halto e pashent ta haya mas di e solucion di oxigeno (saturacion super eleva) cu ta yuda crea ader nobo cu consecuencia di miho sanacion di herida. Esaki mayoria biaha ta un bon solucion pa pashentnan cu tin herida diabetico of otro tipo di herida complica.
Mirando kico tur esaki por nifica pa nos pashentnan Hospital ta sumamente positivo y ta spera di por conta riba e sosten pa por yega na e Unidad di oxigeno hiperbarico.