Dr. Horacio E. Oduber Hospitaal a organisa su evento pa celebra hubileo di un cantidad di empleado y alabes dispidi di algun colega cu ta bay disfruta di nan pensioen. Charlaine Alexander-Huntington di e departamento di Comunicacion y Informacion di Hospital a duna di conoce cu e aña aki e grupo ta asina grandi cu a dicidi di parti’e den 3 celebracion. Durante e di 3 celebracion a celebra 12,5 aña, 25 aña, 35 aña y 40 aña di servicio. Pues durante e di 3 celebracion a conta un total di 660 aña di servicio.
Por ehempel, tin 2 specialista cu ta celebra 12,5 aña di servicio y tambe tin empleadonan di “Interieur”, di Cafetaria, enfermero y hopi otro funcion cu a topa hunto pa celebra nan añanan di servicio y na mesun momento pa yama danki na e coleganan cu a dedica hopi aña di servicio na Hospital y cu aworaki ta bay sosega nan curpa cu un pensioen bon mereci.
Despues di e parti oficial na unda ta otorga na pin brons, plata of oro a pasa un video cu mensahe di colega pa colega, cu a percura pa hopi emosion, recuerdo, harimento y anecdotanan di e cantidad di añanan di trabou. Pero alfinal e regalo mas grandi tabata e atardi cu nan a celebra cu nan coleganan pafo di trabao den un esfera sumamente ameno.
Finalmente, e vocero di Hospital a yama tur e hubilarionan pabien y a yama e pensionadonan danki pa nan añanan di dedicacion fiel.
Dr. Horacio E. Oduber ta existi desde aña 1976 y su nomber ta na honor di e prome dokter Arubiano. Cu mas di 1000 empleado trahando diariamente pa atende e mas di 16.000 pashentnan pa aña, Hospital ta conta cu 320 cama y ta brinda un variedad grandi di servicio medico na nos comunidad y na turistanan. Pa por eherce tur e intervencionnan medico aki, Hospital ta conta cu un centro di rehabilitacion, un centro di terapia fisico, un departamento di emergencia, wondenpoli, diabetes center, pain clinic, oncologia day-care unit, 5 sala di operacion, Intensive Care Unit y asina por sigui menciona.