FLORIDA – Horcan Matthew por draai y bin bek Florida di nobo despues di toca tera e siman aki, segun algun modelo di pronostico.
E prome impacto den centro di Florida, lo ta mas peligroso: Matthew por toca tera na Florida diabierna mainta como un horcan categoria 4, segun e mas reciente proyeccionnan. Autoridadnan a pidi mas di 2 miyon di persona pa nan bandona nan cas den e costanan di Florida, Georgia y South Carolina.
Dianan despues, segun algun modelo ta pronostica, e tormenta lo bay ariba na e costa y lo draai bek di regreso pa Florida.
E modelonan di pronostico ta yuda predici clima; e ta funciona cu supercomputernan cu ta ingresa datonan atmosferico di henter mundo riba formulanan specifico. Cada modelo tin un formula diferente, no obstante y e resultadonan no semper ta mesun cos. Ora cu nan ta, ta mas probable cu e pronostico lo ta corecto.
E modelo Mericano, Global Forecast System, conoci como GFS, ta indica cu e tormenta lo debilita considerablemente y lo impacta zuid di Florida na principio di otro siman. E modelo Europeo ta mustra cu e tormenta lo bin bek, pero ta pronostica cu e lo mantene su mes aleha di e costa. Eventualmente, e modelo Europeo ta mustra cu e tormenta ta bira, moviendo oost, mas den Atlantico.
E modelonan meteorologico a mehora hopi den e ultimo 30 añanan. No obstante, tur modelo ta menos preciso na medida cu ta pronostica mas pa futuro. Asina cu aunke ta posibel cu e toca tera pa di dos biaha na Florida otro siman, e probabilidad ta abao y e pronostico por cambia rapidamente.
Fuente: CNN en Español