E sushedadnan cu tin rond Aruba ainda ta hopi. Practicamente tur dia ta drenta keho di esaki na Bureau City Inspector. Por bisa cu nan tin nan mannan yen cu trabou, segun relacionista public Robby Rosel a comenta den un entrevista.
El a duna e ehempel, pa loke ta pariba di brug, for di Zeewijk 89 bin abou te banda di Marinieskazerne. Pero no solamente na e parti banda di lama, pero mas aden tambe. Esaki ta conta den e area tambe di Noord Cura Cabay. Esaki ta e caso tambe na Zeewijk, banda di e Santana, mas pariba na Parish Hillweg y banda di e molinanan di biento. “Bo ta haya tur tipo di sushedad tira,” Rosel a conta.
A haci limpi na varios area pariba di brug pero no ta completamente cla pa cual lo sigui denter di algun dia.
Mientrastanto a bay na e parti pabou y tambe a topa cu basta luga sushi, entre otro sitionan cu ta atraccion pa tanto local como bishitantenan, manera Hooiberg. Probablemente hendenan cu ta bay cana ta laga sushi atras. Por bisa cu no tin un area na Aruba cu por bisa no tin sushi, hasta tin area conoci unda ta haya cantidad di tapaboca cu ta acumula. E area na unda tin mas sushi, di loke nan tin conocemento di dje, ta Dakota.
E situacion aki ta den man di cada ciudadano. Cada persona cu ta biba riba e isla aki mester percura pa mantene Aruba limpi. No tira sushi unda cu ta, pasobra den un resumen haci a conclui cu den 19 area di Aruba a topa cu basta sushi acumula. “Bay Serlimar busca bo bari di sushi. Nan ta recoge sushi tur siman.”