Durante di dia, Bureau City Inspector hunto cu su team a bay haci un bishita den e bario di Zeewijk mirando tanto reclamo cu ta drenta di e bario cu tin hopi sushi tira ariba tereno nan publico y rond di cas. Mesora nos a subi caya pa por controla e situacion aki y en berdad nos por bisa cu tin un gran parti di e casnan cu ta tira tur tipo di sushi pafo di nan cas. Nos a trata di por a haya e personanan aki pa por papia cu nan pero nos no a logra. Esunnan cu si nos a atende cu nan lo bay tuma esaki na serio pa lanta e sushi nan aki y mantene rond di nan cas limpi. Loke cu ta tristo ta cu e hendenan ta yega tira mata di coco, stoel, cama bieu y corchon, television ariba caminda publico y sin pensa cu esaki no ta cuadra. Nos kier pidi hopi atencion di cada persona cu ta biba den Zeewijk pa mantene rond di nan cas limpi y nechi mirando cu tur e sushinan aki ta yama raton, djaca, cacalaca y tur tipo di enfermedad.
Asina aki lo sigui controla tur barionan aki na Aruba, pa asina nos por logra tin un Aruba limpi y bunita pa un y tur. Meta di Bureau City Inspector ta mantene e bario y bisindario unda cu bo ta biba aden limpi y saludabel pa asina tur hende por sinti e siguridad y trankilidad cu nan merece di tin.
1. Limpieza
2. Salud
3. Siguridad
4. Trankilidad
Bureau City Inspector su trabou ta pa niun di e 4 aspectonan aki wordo stroba of para. Nos ta bay na e sitio unda e caso ta tumando luga y observa e problema y despues pone e instancianan concerni na altura pa asina por tuma medida nan pa por resolve e problema.
Pa mas informacion por tuma contacto 582-9777 .Pa cualkier keho ta importante pa hasi esaki via www.InfrAruba.com y nos lo bishita e sitio.