Resultadonan di estudio ta revela, cu hopi mucha jong, di entre 12 cu 14 aña, no tin conocemento casi di nan mesun curpa. E studiante cu a haci e estudio aki na Aruba, Sra. Kirsten van Sandvoort di Avans Hogeschool ta splica con esaki a ser haci bou di e hobennan.
Den practica, nan tabata bay haci bishitanan na cas, y asina nan a bin compronde cu den e bida di un mama hoben hopi biaha tin diferente motibo ta hunga rol. Hopi biaha ta diferencia di cultura y tambe hopi biaha tin casonan di abusonan sexual.
Droga y alcohol tambe ta hunga un rol den bida di un hoben cu e ta sexualmente activo na un edad relativamente jong. P’esey nan a bay haci un investigacion kico ta e influencia di tin mayornan separa, kico ta e influencia di abuso sexual, alcohol y droga riba e hecho di ta sexualmente activo na jong y tambe e conocemento cu e mucha ta haya for di tempo di scol basico.
Cultura, abuso sexual, droga tur esakinan por hunga un rol e pakico mucha muhenan ta bira activo. Den e investigacion haci door di e studiante , muchanan di scol basico, di edad di 10 pa 12 aña masha poco conocemento tin di nan mesun curpa y nan sexualidad.
Un ehempel, cu Sra. Zandvoort a duna, ta cu aki na Aruba mucha muhenan ya ta haya nan periodo entre 9 pa 12 aña. Esaki compara cu Hulanda, caminda e mucha muhenan ta desaroya hopi mas despues. Den 5e pa 6 e klas, e mucha muhe no sa kico ta un ciclo di menstruacion. Pero 77% di e mucha muhenan no sa kico ta un ciclo di periodo y kico por ta e consecuencia di tin un periodo asina jong. Hopi di nan ta drenta den un actividad sexual, sin sa kico por ta e consecuencianan cu esaki por trece cun’e.
Segun Sra. Van Zandvoort, di nan banda como studiante nan ta cla cu nan investigacion, y ta spera cu bin mas investigacion basa riba recomendacionnan cu e y su otro coleganan studiante a haci.