Segun e departamento di seguridad di Polis di Veracruz, 13 persona a muri, entre nan un mucha, y otro cuater a keda herida debi na un tiroteo cu a tuma luga durante un fiesta di famia den e ciudad di Minatitlan, estado di Veracruz den sur di Mexico. Hugo Guitierrez Maldonado, secretario di seguridad publico di estado di Veracruz, a declara: “Forzanan Federal y estatal a haci un operacion solido di buskeda y captura di esnan responsabel di loke a sosode na Minatitlan”.
Autoridadnan federal Mexicano a colabora cu autoridadnan di estado di Veracruz y a inicia un buskeda pa gara esnan responsabel, segun e Secretaria di Seguridad y Proteccion Ciudadano a duna di conoce. No ta conoci di inmediato kico tabata e motibo di e tiroteo di awe, pero segun informe, un tal “El Beky” tabata wordo busca. Segun informacion “El Beky” ta doño di un bar den e bario di Minatitlan. Gobierno Mexicano a bin ta bringa un guera contra narcotraficante for di December 2006, mientras cu e cartelnan di droga mes ta bringando entre nan mes pa control di nan teritorio. Segun informe un 150 mil homicidio intencional tin registra na Mexico desde 2006.