MEDELLIN/CHAPECO – Mas di 20 mil persona a rindi diaranson den e ciudad Colombiano di Medellin den un calido homenahe na e club Brasileño Chapecoense, tras di e accidente aereo caminda cu 71 persona, mayoria integrante di su delegacion cu lo a bay disputa e final di Copa Sur Americana contra Atletico Nacional, a perde nan bida.
Bisti na blanco, e asistentenan di e stadion Atanasio Girardot, a entona canticanan di apoyo di Chapecoense, mientras cu riba e tribunanan di e escenario por a mira mensahenan alegorico na amistad den futbol cu e frase #ForçaChape.
E acto, cu a cuminsa cu un interpretacion di e himnonan nacional di Colombia y Brasil y e toke di un minuut di silencio hopi respeta, tabata tin como detaye destaca e intervencion di e minister di Relacionnan Exterior di Brasil, Jose Serra, kende a ranca e aplauso di e publico a bisa: “No ta casualidad cu Atletico Nacional y Chapecoense tin e mesun colornan: berde speransa y blanco paz.”
Un di e detayenan mas sobresaliente di e homenahe ta cu hopi hende a keda sin drenta Atanasio Girardot, a keda pafo di e escenario deportivo ta fluit y aplaudiendo e Chapecoense, den un gran muestra di deportividad y afecto.
Entretando, na Chapeco, siguidonan di su ekipo di alma, tambe a presenta den e stadion, pa aplaudi y recorda su ekipo.
E stadion tabata un muestra di sentimento di e ciudad aki, cu ta consterna tras di e ilusion cu a lanta su ekipo cu e posibilidad di gana e partido di e baymento pa Medellin y cun’e e prome campeonati importante di e historia di e ekipo.
E ciudad di 200 mil habitante ta na luto y ta peparando pa un entiero colectivo precisamente eynan den e stadion; pesey nan ta adelanta un recoleccion di firma.
E directivanan di e club no sa ainda ki ora e curpa di e 19 hungadonan, e cuerpo tecnico y e directivanan di e ekipo cu a fayece den e accidente, lo yega.
Famia y amigonan di e victimanan ta ricibiendo ayudo psicologico den e vestuario di e stadion mientras cu e ekipo ta sigui ricibi apoyo y solicitudnan di mas fanatico di otro ciudadnan di Brasil pa uni na e ekipo.
Fuente: CNN en Español