Bingo a canta den Airport na e parti di seguridad, pero na e di dos punto di control. Pasobra pa un persona cu ta traha den airport tin cu pasa dos punto di chek di security, e prome ta di AAA mes y e di dos punto ta di AGS. Un homber ta traha na restaurant cu ta bende cuminda Italiano a pasa e control di security di AAA eynan ningun hende a pare pasobra tur cos tabata ‘bon’ pero ora a pasa na e di dos punto di control na e mashin di AGS aki e personal a canta bingo. A tuma nota di pakinan sospechoso den su tas y a bati alarma. Recherche douanne den airport a presenta y detene e homber di biaha y a tuma e tas den beslag debi cu a topa cu pakinan di droga. Un total di 22 Kilo di droga a keda haya den e tas diabierna mainta.
Segun e sospechoso no ta prome biaha ta pasa cu cosnan via seguridad di AAA, esaki ta duna indicacion cu lo por tin complicidad di algun personal cu sigur AAA tin cu haci invesigacion. E caso aki a cay den man di departamento narcotica di polis cu lo bay haci nan investigacion profundo.
Esaki ta indica cu e mashin nobo cu AGS a laga instala ultimo ta di uno di calidad cu nan por detecta cosnan sospechoso cu ta pasa.