Un homber tabata blanco di cherche y critica debi cu el a pidi su pareha pa casa den un di e franquicianan popular di galiña, esta Kentucky Fried Chicken (KFC). E hecho aki a sosode na Surafrica y awo el a ricibi e noticia di su bida di parti varios marcanan reconoci cu a dicidi pa dune apoyo pa e bruid. Apesar cu algun persona a cualifica e homber, kende a wordo identifica como Hector, pa un homber “sin clase”, otronan a sinti alegria y emocion pa e escena aki cu a sosode dilanti tur cliente den KFC. Hasta riba media social a yame “#KFCProposal”. Sinembargo, e comentarionan negativo a keda na segundo plano na momento cu e hecho aki a bira viral riba internet y asina varios corporacionnan a laga mustra nan banda “humano” y asina a duna e pareha aki regalonan increibel y hasta inespera. E sucursal Surafricano di e famoso restaurant di galiña a pidi su siguidonan ayudo pa haya e pareha y asina duna nan un regalo. Despues di menos cu 24 ora, nan a haya e pareha. “Nos proporciona nan tur apoyo cu nan mester pa haci e bruid di nan soño un realidad. Nos a recluta un wedding planner pa yuda nos y cumpli cu nan deseo”, asina KFC a bisa den un declaracion via Twitter. Di su banda, e compania Aleman di auto Audi a anuncia cu nan lo ta ocupa cu e transporte di e pareha riba e dia di casamento. Mescos cu e marca reconoci di paña deportivo, Puma a saca un publicacion anuncia cu “Hector y su pareha Nonhlanhla ta haya e suma di 675 Dollar pa gasta den su tiendanan. Standard Bank a priminti cu si nan sigui ta miembro di e banco, nan lo kita nan fianza personal pa un suma di 20.200 Dollar. Pero e sorpresanan no ta caba akinan, Huawei a ofrece nan telefonnan celular p’asina nan por saca potret di e momento memorabel durante nan bruid. Un joyeria lo duna nan un renchi bunita di un balor di 3 mi Dollar. E tienda a bisa cu nan merece un renchi di oro roos cu Diamante. Increibelmente e regalonan ta sigui yega y e candena KOO y un chef profesional, a ofrece pa traha e cuminda pa e celebracion di bruid. E fecha di e bruid mes ta programa pa 31 di December e aña’ki.