LIMPOPO, Surafrica- Un olifante a placha un homber cu tabata purba di tur manera pa jaag ariba un neushoorn. Un manada di leon a como su cadaver despues den e Kruger National Park, e reserva di caza mas grandi di Surafrica, segun Daily Mail a informa.
Segun e medio Britanico, tres amigo di e victima a huy for di e luga y a avisa e famia di e cazador, cu a tuma contacto cu autoridadnan di e parke, pa localisa e curpa sin bida di nan familiar. Pero nan a logra haya solamente loke a resta: su craneo y su carson.
“Drenta den e Parke Nacional Kruger di manera ilegal y na pia no ta prudente, e ta trece hopi peliger cun’e y e incidente aki ta demostra esaki”, e director ehecutivo di e parke, Glenn Phillips, a bisa. Tambe el a detaya cu e tres compañe nan di e fayecido a wordo aresta y a haya den nan poder dos rifle di jaag y municionnan pa no tabata tin permiso pa jaag. Phillips a indica cu a detenidonan lo wordo poni na disposicion di husticia mientras cu e caso ta bou di investigacion.