SALT LAKE CITY (UTAH), Merca — E homber cu a tira un studiante di e Universidad di Utah mata den e campus di e universidad, tabata su ex pareha. Esaki a wordo haya morto den un misa tres hora despues di e incidente, autoridadnan a informa diamars.
Lauren McCluskey, originalmente di Pullman, Washington State, a wordo asesina di un tiro pafo di su dorm rond di 10 or di anochi dialuna. Polis a informa cu e victima tabata tin un relacion amoroso cu e atacante identifica como Melvin Rowland.
Polis a persigui Rowland, di 37 aña, pa un misa pafo di e campus despues di a wak’e rond di 1 or di mardgua, Brian Wahlin, teniente di e polis universitario a bisa. El a agrega cu e cadaver di e atacante a wordo haya paden di e misa. Autoridadnan no a divulga con Rowald a muri.
Universidad di Utah a manda un tweet cu e individuo a wordo localisa y cu “e no ta forma un menasa mas”.
McCluskey tabata practicante di atletismo y tabata studia comunicacion social. Segun prensa local, e tabata tin 21 aña.
Presidente di e universidad, Ruth Watkins a bisa cu lesnan a keda cancela te otro aviso y cu lo realisa un vigilia pa 5 or di atardi diamars.