LINCOLN, Mississippi – Un homber a wordo deteni como e unico sospechoso di a mata e anochi di diasabra ocho persona den tres tiroteo distinto den un zona rural di Mississippi, zuid di Merca. Entre e fayecidonan den e condado di Lincoln, ta e vice sheriff local. Autoridadnan ta sigura cu ta “prematuro” specula riba e motibonan di e tirador y cu ta desconoce si e tabata conoce su victimanan.
E sospechoso, segun medionan local, ta Cory Godbolt, un homber di color di 35 aña cu tabata fuertemente arma y a cambia di vehiculo mientras cu e tabata ehecuta su asesinatonan selectivo.
Polis a arest’e e mainta di diadomingo tras di a logra inicialmente huy di e agentenan. Un periodista di e corant local The Clarion Ledger, a logra papia cu e sospechoso mientras cu e tabata na boei benta abao, rondona pa varios agente policial. Su testimonio ta sugeri cu e tiroteonan ta responde na disputanan familiar.
Cu un trankilidad abrumador, Godbolt ta sigura cu e morto di e vice sheriff no tabata intenciona y cu su obhetivo tabata mata e pareha di su casa, pero cu “a keda sin bala.” E sospechoso a splica cu el a dirigi pa e cas di su muhe pa trata di bay cu su yiunan y cu na e momento ey polis a aparece.
Tambe e ta relata na e periodista cu a entrevist’e, cu su obhetivo tabata pa muri tira pa polis ora cu e wordo deteni. Y ora cu a puntr’e kico ta sper’e awo, el a responde varios biaha cu letania: “Morto.”
Ora di spera pa clarece e detayenan di e suceso aki, un di e incognitanan ta con e tirado a haya e arma of armanan di candela cu el a uza den e asesinatonan. Pero ta parce improbabel, teniendo na cuenta e antecedentenan, cu e matansa, mas leu di e conmocion inicial, propicia un debate duradero riba e violencia arma ni cambionan relevante den e control di arma na Merca.
Violencia arma ta haci Merca un anomalia den un mundo desaroya. Cada dia, 89 hende ta muri pa motibo di disparo di armanan di candela, segun un promedio di e Campaña Brady. Cu 321 miyon di habitante, ta calcula cu tin por lo menos un 270 miyon di arma di uzo priva, un derecho ampara pa e Constitucion. Ta e proporcion mas halto di mundo: nuebe arma pa cada dies ciudadano.
Fuente: http://elpais.com/