Diahuebs pasa di 12or di marduga automobilista nan yegando e rotonde di Paradera a keda bombardia cu piedra pa un homber para banda di caminda y te hasta kier a bula riba e auto nan. Mesora nan ta notifica central di polis y central di polis ta manda un patruya na e sitio. Na yegada di e patruya e polisnan a bay atende cu e homber pero di biaha a ripara cu e homber ta posibelmente bou di influencia di algo y lo a flip y pone cu e ta hopi agresivo.
Polisnan a bay over na detene pero esaki no a bay facil y te hasta polisnan mester a lucha cu e homber cu tawata hopi agresivo. Polisnan a pidi resfuerso y unda mas patruya di Santa Cruz y tambe Playa a bin duna un man. Dogcatcher a presenta pa hiba e detenido warda. Total di 3 auto un Chevrolet Tahoe, un Nissan pick-up Frontier y un Daihatsu Terios a ricibi daño di e piedra nan tira. Polis a pidi tur chauffeur pa pasa warda di Playa pa nan tuma e denuncia nan.