Diaranson, den oranan di merdia, un dama a presenta na warda di polis, pa asina conta loke a sosode cu su yiu despues di scol. Merdia, pa mas of menos 1’or y 50 di merdia, e denunciante a yama Central pa duna di conoe cu su yiu homber di 12 aña, tabata na caminda pa cas for di scol, ora cu el a wordo ofreci pa haya un lift, entre 1’or y 5 y 1’or y 20 di merdia, door di un homber desconoci. E homber, kende tabata e chauffeur di un pick up blanco, a bisa na Papiamento cu su mama a puntr’e pa dun’e un lift pa cas. E mucha a spanta y a core drenta un tienda Chines, esta Fung’s Supermarket. E hoben, kende ta un alumno di St. Anna School, a describi e conductor como un homber color cla, cu tabata tin un bril di solo bisti y tabata tin un barba estilo chivo. Segun e hoben, tabata un pick up grandi y blanco. E number di auto e no por a tuma completo.