Willemstad Curacao: Djabièrnè 14 di desèmber 2018, alrededor di 06.21 or, Sentral di polis a haña informashon ku un persona a akudí na entrada di Post 5 i mèldu ku e la keda atraká.
Na momentu ku e patruya tabata bayendo na e sitio ariba menshoná, sentral a mèldu ku a drenta un otro yamada ku e sospechoso di e atrako ta riba Pinosweg.
Na yegada di e unidat polisial na Pinosweg, e agentenan a topa un agente ekstraordinario pa tereno di Isla, ku e sospechoso detené.
E agente ekstraordinario aki a deklará na e patruya ku na momentu ku e la mira e sospechoso e la dun’é òrdu pa para, pero e sospechoso na su turno a hinka un man bou di su kaminsa i kana bin den su direkshon.
E agente extraordinario na e momentu ei a lòs un tiru di advertensia. Mirando e echo ku e sospechoso a keda ku su man bou di su kaminsa i sigui bin den su direkshon e agente ekstraordinario aki a hañ’é obligá ta lòs tiru dirigí riba e sospechoso.
E sospechoso a risibí impakto di bala na altura di su pia parti ariba.
Ambulans ku a yega na e sitio a transportá e sospechoso pa Poliklínika di SEHOS pa tratamentu médiko.
Promé ku e sospechoso a keda tranportá ku ambulans, Polis a listra e sospechoso i a haña un arma blanku den su saku.
Kontinuando ku e investigashon riba e kaso aki alrededor di 10 or di mainta riba òrdu di Fiskal di Ministerio Pùbliko, Polis a detené e agente ekstraordinario A.J.E.G. nasé na Kòrsou di 35 aña di edat, komo sospechoso di maltrato ku arma.
E investigashon den e kaso aki ta kontinua.