Internacional: Oficialnan di Southwest Louisiana a detene un homber di 58 aña relaciona cu tiramento riba un grupo di hoben cu tabata hungando “kaki sconde”, unda un di nan a resulta herida. E incidente aki a tuma luga Diadomingo den un area chikito cu yama Starks, situa den Louisiana.
Autoridadnan a splica cu cu “un grupo di hoben tabata hungando kaki sconde den e area y tabata scondiendo den e bisiña su propiedad”, ora cu David V. Doyle a los tiro.
Doyle a splica e recherchenan cu el a “observa par di sombra pafo di su cas, na momento cu el a bay paden y tuma su arma di candela. El a splica cu despues el a bay bek pafo y observa hende ta coriendo bay for di su propiedad unda cu el a cuminsa los tiro den nan direccion”.
Un hoben femenino di 14 aña a wordo tira den su cabes parti patras y a bay cu urgencia direccion hospital unda nan ta bisa cu “su heridanan no ta nada alarmante”.
Den e area unda cu e tiramento a sosode, ta un caya sin salida cu solamente 3 habitante: Doyle, e famia di e victima y un conoci di e victima su famia.
Doyle a wordo acusa cu: 4 cargo di zware mishandeling cu un arma di candela y descarga ilegal di un arma di candela.