CALIFORNIA, Merca- Un hurado di San Fransisco diabierna a duna ordo pa e gigante den agribusiness pa paga 289 miyon dollar na un ex hardinero di un scol cu ta den su ultimo etapa di cancer. Causa di e cancer tabata e pesticida Roundup. E demanda di Dewayne Johnson tabata e prome entre mas di shen demanda den cortenan estatal y federal, acusando Roundup di ta causa non-Hodgkin’s lymphoma, cual Monsanto ta nenga.
Huradonan den e Corte Superior estatal a acorda cu e producto a contribui na e cancer di Johnson y e compania mester a pone un label avisando di un posibel daño na salud. Abogadonan di Johnson primeramente a demanda Monsanto pa 39 miyon dollar, cual nan a gana y 250 miyon dollar di e 373 miyon dollar cu nan tabata buscando di daño y perhuicio.
“E hurado ta haya cu Monsanto a actua di mala fe y opresion ya cu nan tabata sa cu loke nan tabata haciendo tabata algo malo y a sigui haci’e, sin importa e bida humano”, segun Robert F. Kennedy Jr., miembro di e ekipo legal di Johnson. “Esaki mester manda un mensahe fuerte na e hunta di directiva di Monsanto”.
Monsanto a nenga di cu ta existi un vinculo entre e ingrediente activo den Roundup (glifosato) y cancer, bisando cu mas di shen estudio conduci a establece un glisofato ta safe.
Johnson a uza Roundup y un producto similar, Ranger Pro, como persona encarga cu e hardin di un scol den e San Fransisco Bay, segun su abogadonan. El a spray gran cantidadnan di un taki di 50 galon conecta na un truck y durante bientonan duro, e producto tabata supla bin den su cara, Brent Wisner, un di su abogadonan a bisa.
Johnson den corte a bisa cu durante su cuater añanan como hardinero den e districto escolar, el a spray 150 galon di Roundup 20 pa 30 biaha pa aña. Durante su interogatrio el a describi loke la yama e uzo cuidadoso di e producto.
“Mi a pensa, cu si e producto por mata insectonan, e lo por mata ami tambe”, Johnson a bisa. “Mi a tum’e na serio. P’esey mi a bisti tur loke mi tabata tin pa proteha mi mes”.
El a describi dos dia unda cu, accidentalmente, el a keda tur muha di e pesticida. El a yama e number di atencion na cliente di Monsanto, pero e compania nunca a yama bek.