Diahuebs 18 di Mei, durante cu patruya tabata haciendo nan control den centro di ciudad na altura di The Pleasure Zone nan ta wordo acerca door di un dama di bida alegre. El a declara cu un homber, color cla cu petchi ariba su cabes y cu rugtas ta haciendo fastioso. Segun e dama di bida alegre, e homber lo ta den ciudad ainda. Na altura di Java Bar agentenan policial a topa cu e homber cu tabata cuadra cu e descripcion. E tabata para wak paden via di e bentana.
Bartender di Java Bar a bisa polisnan cu e homber en cuestion tabata molestia su clientenan y tambe su trahadonan di bida alegre. E homber en cuestion tabata e conocido di polis Christopher G. E ta pidi patruya un lift pa Playa y ta subi boluntariamente den e patruya. Agentenan ta hib’e warda di polis na San Nicolas unda cu a tuma contacto cu su tata, kende a declara cu Christopher ta interna den Centro Colorado. Ora cu patruya a hib’e eynan, e personal a declara cu esaki ta e di dos biaha cu e ta scapa for di e centro y cu no mag di keda mas eynan. E ora patruya a hib’e na cas di su tata na Caya Tapushi, pero esaki no tabata kier su yiu den cas y a bisa polisnan cu nan mester hib’e PAAZ. Pero e agentenan a mustra e tata di Christopher cu esey ta su responsabilidad y no di nan.
Un rato despues patruya ta topa cu Christopher dilanti di un cas na Caya Bohi. segun e habitante di e cas, ora el a sali pafo el a topa cu Christopher den su cura y tabata wak paden.
No a keda patruya otro opcion di bah’e dilanti warda di polis. Despues di a hala su atencion, el a wordo cori for di e sitio. E caso tin atencion di autoridadnan.