Diabierna 2 di Juni, Corte di Prome Instancia a trata e caso contra di e sospechoso di inicial J.T., di 28 aña, acusa di a maltrata su baby di 7 siman E caso a wordo trata dia 19 di Mei, caminda cu Fiscal a exigi 30 luna di prison di cual 6 luna ta condicional. Esaki tabata un caso cu a causa hopi consternacion den comunidad.
CASO
E caso di maltrato mes a tuma luga entre 8 cu 10 di Maart 2016, caminda cu su baby di 7 siman a wordo maltrata severamente cual a causa fractura di ribchi, weso di pia y sla na cabez. Fiscal ta considera esaki maltrato severo. J.T. ta para ariba cu e no a haci nada y cu e ta haya cu ta inhusto cu e ta cera pa algo cu e no a haci. Hues a bisa cu e dama B., mama di e baby, a haci denuncia. E baby tabata yora hopi y ora J.T. yega cas, e tabata rabia cu e baby ta yora. Den declaracion di B. na polis e ta bisa cu e baby tabata hincha y cora y cu e ta kere cu J.T. a duna e baby respiracion artificial. Den oranan di anochi, cu e baby tabata yora, J.T. a papia duro cu e baby bisando e cu e no ta e baas den cas. Su siguiente dia B. a mira pia di baby blauw y a dicidi di bay dokter. Segun B., J.T. a puntra kico e lo bay bisa dokter y nan a palabra cu e mucha a cay. E dia despues J.T. a bay papia cu e dokter y dia 16 di Maart, e ta wordo deteni.
Rapport forense:
Hues a sigui bisa cu den e dokternan na hospital a samina e baby y nan a constata cu e baby tabata victima di maltrato y cu e criatura ta den trauma. E ora a dicidi pa acerca Noordelijk Forensisch Instituut (NFI) di Hulanda pa un evaluacion y pa haya un rapport di un experto. Den e rapport, e expertonan no por a conclui con e mucha su pia por a kibra. Si nan ta bisa cu e sla na e cara di e criatura por ta door cu el a cay entre e cama cu e muraya. Pero segun e experto, cu e mucha su pia ta kibra no ta accidente.
Hues a puntra J.T. kico e lo haci ora e recobra su libertad. Segun T., e lo bay traha y bay keda na su tata. El a bisa Hues cu e tin mas di aña y mei caba cera.
RAPPORT PSICOLOGO
A haci un evaluacion psycologico cu T., y den e rapport ta conclui cu T. no tin problema mental. Pero si J.T. tin tendencia di ta koppig y ta sufri di paranoia. E ta haya cu ta hopi importante pa J.T. haya un tratamento pa e siña controla su mes, pa controla su rabia cu e tin.
EXIGENCIA DI FISCAL:
Fiscal a haya cu a keda legalmente proba cu J.T. a maltrata su yiu di apenas 7 siman. El a bisa cu e rapport di NFI ta mustra bon cla cu e criatura a sufri maltrato. Tambe el a bisa Hues cu e no ta kere e storia di J.T. Tambe Fiscal a bisa cu e ta tene cuenta cu circumstancianan personal di J.T. y cu ta prome biaha cu ta bay cera pa un caso asina. Tambe Fiscal a tene cuenta cu e rapportnan di Reclasering y psycologo. Fiscal a mustra cu segun hurisprudencia ta entre 24 y 30 luna di prison tin pa e maltrato aki y a exigi 30 luna di prison di cual 6 luna ta condicional cu un tempo di prueba di 3 aña. Esaki pasobra psycologo ta mustra cu tin risico cu J.T. lo keda actua agresivo. Fiscal a pone condicion cu J.T. lo cay bou Reclassering durante e 3 añanan di prueba y e mester sigui cursonan pa controla su agresividad.
ABOGADO Mr. ZARA
Den su pleidooi Mr. Zara a bisa hues cu e no por a prueba cu J.T. a maltrata e baby of cu su cliente lo a kibra pia di e baby. Tambe el a mustra cu hurisprudencia ta splica bon cla ki ora ta papia di maltrato servero y ki ora no. Den e caso aki, e maltrato di e baby no por wordo proba. Segun mr. Zara, mama di e baby, e muhe B. ta gaña.
SENTENCIA
Diabierna J.T. a presenta den caso pa asina skucha su sentencia. Aki ta caminda cu Hues a hisa e castigo pidi pa Fiscal anteriormente, y a ta sentencia J.T. na 36 luna di castigo, di cual 6 ta condicional, cu un periodo di prueba di 3 aña, y den e tempo aki e lo mester bay bou guia di Reclassering y tambe cu e mester bay un curso pa siña controla su agresividad. Por a nota riba e expresion di cara di J.T. cu e castigo halto aki a bin manera un sorpresa p’e.