Diadomingo, pa mas of menos 1’or y 45 di marduga, Central ta dirigi patruya di Noord na Riu Antillas Casino, den cuadro cu un persona burachi. Eynan a papia cu personal y hunto cu e controleur di e casino, kendenan a declara cu un hoben color scur, bisti cu un pechi preto, tabata molestia e clientenan. Alabes nan a bisa cu ningun hende den e casino, no por a core cu e persona aki. Dicho homber a laga sa cu e yama RdP. Patruya a bay papia cune y a pidie pa bay pafo pa e scucha su storia. Dado momento RdP a lanta, a tira algun ficha di e casino den direccion di un “dealer” y a cana bay pafo. Pafo di e casino polis a purba di papia cu RdP riba su comportacion y a bise bon cla cu tin reglanan di cas y cu e mester sigui nan. RdP a cuminsa insulta tur hende (personal di e casino, e controlador di casino y polis). Mirando cu RdP tabata bao di influencia di alcohol, y cu e tabata papia cu un lenga pisa y tabata tin wowonan cora y tabata hopi inkieto, el a wordo deteni pa su siguridad y pa di otro. RdP a wordo hiba warda na Noord, caminda cu el a keda presenta dilanti di Fiscal Auxiliar y despues encarcela pa buracheria na warda di Shaba. Mirando cu e sospechoso a duna diferente nomber na Fiscal Auxiliar, e sospechoso lo wordo pasa pa control na personal di Warda nos Costa.