Diadomingo anochi, Central di Polis ta manda patruya di San Nicolas pa Seroe Colorado pa un pelea entre bisiña. Na yegada di patruya e habitante ta manda polis pa e adres bisiña.
Eynan autoridadnan ta papia cu e habitante kende ta declara na polis cu un auto Volkswagen, tipo bus cu glas getint a yega para dilanti su cas. E chauffeur di dicho auto ta baha e glasnan di e auto un poco y ta pidi e habitante pa awa. Declarante no por a wak cara di e chauffeur y tampoco si tabata tin mas hende den e auto. E homber a papia papiamento, cual e declarante no ta compronde. E auto a bay y despues di un rato ta bolbe. Esaki a pone e habitante dal un grito di auxilio den direccion di su bisiña.
Patruya a bay investiga den vecindario y a bin topa cu un auto cu ta cuadra cu e descripcion di e declarante para na Baby Beach. Momento cu e patruya ta acerca e auto, esaki ta reverse. Patruya ta duna e chauffeur señal pa para, y esaki ta cumpli cun’e.
Un oficial di polis ta acerca e auto, pero e chauffeur ta nenga di haci caso di autoridad y ta laga tanto e porta como e bentananan cera. Polis a keda bati na e bentana. Despues di un rato e chauffeur ta baha e bentana na banda di pasahero un poco. Pero autoridad ta duna e chauffeur ordo pa habri e bentana un poco mas. Di e manera aki, e oficial di polis ta haya oportundiad di habri e porta, door di hinca su man paden y habri e porta di paden.
A nota cu e chauffeur tabata basta bou di influencia di alcohol y tambe bou di influencia di algun substancia prohibi. El a cuminsa tembla full y tabata move su kaak na un manera anormal. Tambe e tabata papia bruha. Di baina e tabata por a papia, pero ta declara cu el a bay na e adres ya menciona pa busca awa.
E chauffeur, H.O.O.R., ta keda deteni, a base di articulo 5LWV (core auto bou di influencia) y ta wordo hiba warda di San Nicolas, na unda pa 14:50 e ta presenta dilanti Fiscal, kende ta duna ordo pa duna e chauffeur un cuarto gratis pa asina e pasa su wayaba. E auto A-63802 a wordo parkeer na warda di polis San Nicolas, wardando un persona cu rijbewijs bin busca e auto.
Despues di interogacion y un procesverbaal, e sospechoso a wordo laga den libertad.