Dia 3 di September, Corte Superior a declara e homber M.A.B. liber di tur acusacion. El a wordo acusa di a dal su tanta, B.A.B. un golpi den cabes pa cual e tanta a muri mesora. E caso aki a wordo trata dia 23 di maart 2016. Dia 22 di December 2016, Corte den Prome Instancia a sentencia M.A.B na 12 aña di prison.
Durante tratamento di e caso, abogado di e acusado a presenta un rapport di Centrum voor Forensische Pathologie, di e experto De Groot, pa cual Corte mester a pidi un di dos rapport di het Nederlands Forensisch Instituut. Tambe hues a laga scucha e tata di e acusado como testigo.
E dos rapportnan aki a trece dos pregunta central den e caso. E prome ta: E tanta a fayece berdaderamente di loke Ministerio Publico ta acusa e sobrino?Y e di dos pregunta, den caso cu ta asina: ta e sobrino a dal e tanta pa mata?
Tur rapport medico ta mustra cu e tanta a fayece dor di un derame celebral. Awor e preunta ta: El’a haya un derame celebral dor di un golpi of dor di un caida?
Apesar cu tin sospecho cu e sobrino, kende ta biba cu su tanta y su tata den cas lo tabata maltrata e tanta, den un rapport di dokter na warda e anochi ey, a raporta cu tin plekinan bieuw di blousa.
Esaki ta trece cun’e cu no por proba cu e tanta e anochi ey a wordo golpia, pero ta keda e posibilidad tambe riba e declaracion di e sospechoso, cu esey a wordo ocasiona door cu e tanta a cay.
Debi cu no tin prueba contundente den e caso aki, Corte a declara e homber liber di tur acusacion y pa cual a ordena su libertad di inmediato.