Diadomingo anochi central di polis ta haya un yamada cu lo tin un homber drumi den su auto den e drive thru di Burger King na Paradera. Un patruya di polis ta bay na e sitio y ta topa cu un auto blanco chikito net na e borchi pa hasi pedido y cu un homber na soño den e auto y un rij largo di auto su tras.
E personanan eynan a conta polis cu nan a purba lanta e homber for di soño pero no a logra. Te hasta e stoel di auto e la baha pe drumi. Polis a bati na bentana, a habri e porta a purba di lante pero nada. Despues di basta rato polisnan a logra lante for di soño.
Polis a dicidi di yude y hibe su cas pe por sosega su curpa na cas. Ainda bayendo cas e homber a bisa polis cu e tin hamber pa pasa drive thru pero polis nan tawata un tiki druk y a hibe su cas di biaha.