Diadomingo atardi a sucede un accidente na Piedra Plat riba e t-weg un poco pariba di Burger King. Un pick-up Mitsubishi blanco a yega lora na su man drechi y di biaha despues a lora na su man robes pa subi un caminda di santo ey banda pero un Hyundai Accent blanco ta dal duro den banda di e pick-up.
E chauffeur di e Hyundai Accent ta baha for di auto y kier play tof y ta bay stret riba e chauffeur di e pick up y agredie. Polis di St. Cruz ta yega di biaha. Unidad di K-9 y di Noord tambe a bin reforsa. Polis a detene e chauffeur di e Hyundai Accent pa agresion y menasa.
Na e sitio mas conocir y famia di esun deteni a yega y tambe kier hunga tof pero ora nan a wak e polisnan y cu polis a bisa nan pa nan bandona e sitio of si nan tur hunto kier bai den e dogcatcher nan tur a bira lief lief y bandona e sitio. E dama pasahero den e Accent ta na estado y ambulans a controle. Polis di trafico tambe a presenta pa tuma datos. Daño material ta minimo.