Durante e prome conferencia di prensa yama pa e grupo Salba Urirama, sr. Holmo Henriquez splica riba e desaroyonan di e proyecto Urirama pa cual esaki ta un lucha cu sigur te ainda pueblo di Noord y Aruba ta bringando. Na Club Don Bosco tabata e inicio di e lucha contra e proyecto di Urirama y ta un luga cu ta simbolisa hopi pa e grupo, ya cu a cuminsa eynan. Pa bay un tiki den historia, a cuminsa cu e mucha contra e proyecto di Molina di Biento na Urirama pa diferente motibo y preocupacion den comunidad cu a wordo treci na conocemento di Henriquez y cu a tuma e bandera pa por a lucha pa esnan cu no tabata por riba nan mes of pa e ta un voz pa nan den comunidad, pa no solamente e bunita bario di Noord, pero sino pa henter Aruba tambe. A inicia e lucha aki ya cu e proyecto no ta un proyecto cu lo ta sirbi ningun bienestar general. Gobierno no por a hustifica y no por a pone un meerwaarde riba e bienestar general tambe cu nan ta pretende cu ta bay sirbi. E ta un proyecto cu ta mantene nos costo di bida halto pasobra e ta bay mantene nos costo di coriente halto. Si acaso no tabata tin e molinanan di biento na Vader Piet awe, nos awa cu coriente lo tabata mucho mas abao di locual cu ta awor aki y tambe si no a hedge iresponsablemente manera cu a wordo haci, segun sr. Holmo Henriquez.