Marianne cu ta enfermera na departamento di A3 a yega poco mas trempan cu su shift di trabou pa un supuesto reunion cu su manager. Un trampa cu e no a spera nunca pasobra ora cu ela cana drenta su departamento, coleganan a sali bula di tur skina y grita ‘surprise’. Un momento asina inespera cu ela keda un rato den un shock prome cu ela realisa kico tabata pasando. Ela keda hopi emociona di tende tur e bunita palabranan dicon ela wordo nomina pa ta e empleado di luna di oktober 2024.
Marianna ta un tremendo teamplayer cu ta disponibel cualkier ora cu e team mester di dje. E tin hopi pasenshi y ta esun riba su piso dedica na guia y forma miembronan y studiantenan nobo. Ademas, e ta encarga cu tareanan di coordinacion cu e ta ehecuta na un manera eficiente y husto pa tur colega. Locual su coleganan ta aprecia di dje ta cu Marianne ta un persona sincero y habri cu por acerca cualkier momento. Marianne sa kico ta pasa riba su piso di cuido y ta monitor e calidad di cuido di cerca pe keda optimal 24/7. E ta un persona trankil cu ta tuma su tempo pa splica pashentnan e proceso di cuido y ta duna nan no solamente e atencion cu nan tin mester, pero ta duna extra di su mes pa sigura cu nan estadia ta mas placentero posibel.
Banda di tin hopi comprension y respet pa tanto pashent y colega, Marianne tin talento pa continuamente bin cu ideanan y iniciativanan pa mehoracion y solucion. E ta percura pa tur material cu nan tin mester y ta controla si tur cos ta na ordo pa traha na un manera eficiente y den un ambiente safe y limpi. Semper e ta ehecuta su trabou cu’n disciplina siguiendo e norma y balornan di su funcion y cumpliendo cu e vision y mision di Hospital.
Pa resumi, Marianne ta un empleado cu tin un balor inmenso pa su departamento y pe organisacion den su totalidad. Un persona amabel, dedica y cu no por iguala ela demostra di merece e bunita titulo di ta empleado di luna. Hunta di directiva y team completo di HOH ta sumamente orguyoso di tin Marianne como colega. Masha pabien!
