Diasabra a tuma luga e tan spera Open House di Corte di Husticia di Aruba. Por a mira un gran cantidad di publico presente, pa asina tuma e tempo pa siña conoce e trabao di un guardia di CEA, e trabao di un fiscal pero como tambe e trabao di Hues.
Prensa tabata tin un oportunidad tambe di topa cu mr. Jaap van der Stam pa asina elabora ariba e rol di prensa y e rol di Hof, den comunidad. Tambe a expresa e deseonan pa tin un miho colaboracion entre e dos partidonan.
Mr. van der Stam a duna di conoce cu tin cierto richtlijnnan na cual prensa lo tin cu aten’e su mes na dje, cual ta cu no mag di filma ni graba den sala di Corte. Semper den casonan grandi, lo tin oportunidad pa haci esaki, pero semper y cuando nan tin e permiso cu esaki. Motibo pa cual ta haci esaki ta, cu a pesar di tur cos, mester por respeta privacidad di tanto e acusado como e victimanan. Tambe cu ta bira fastioso pa tin dies of binti flash di camara ta click den sala.
Riba e pregunta di con ta tarda pa pone e sentencianan online, mr. van der Stam a bisa cu esakinan den un siman ya caba nan ta online. Nan lo bay ta mas activo ariba nan pagina di Facebook y asina pa tin un miho contacto entre Hof y e comunidad.
Tambe Sr. mr. Jaap van der Stam a bisa cu lo purba di tene un miho contacto cu miembronan di prensa, y cu Hof semper ta cla pa duna asistencia na miembronan di prensa, por medio di nan vocero (persrechter). Vooral den casonan grandi, lo purba pa e persrechter ta den sala pa asina, den cualke caso cu miembronan di prensa presente den sala, lo por dirigi nan mes na e persrechter di biaha.
Aworaki ta e caso cu despues di un caso, miembronan di prensa lo mester bay pafo y asina entrevista e abogadonan y asina tin nan punto di bista. Cu e persrechter den sala, prensa lo tin tambe, e punto di bista ariba e caso di parti di Hof.
Por ultimo mr. van der Stam a bisa di lo haci lo posibel pa bin cu’n curso unda cu lo splica mas di e terminonan legal, cu hopi biaha no tin un traduccion pa nan. Asina tambe prensa lo ta miho prepara pa ora di relata e casonan den Corte na e pueblo di Aruba.