Manera ta conoci e caso di asesinato cu a conmove comunidad na un cas di famia Chines na Wayaca den luna di September 2017, e culpabelnan den prome instancia a dicidi pa bai Hof y e resultado di esaki a bira conoci. E acusadonan cu ta e hoben Boneriano, kende ta esun cu a comete e acto mes, y e hoben Chines Stevie Fan no tabata di acuerdo cu nan sentencia den prome instancia y a dicidi pa apela y bai Hof. E hoben Chines, kende a keda nenga cu e tin algo di haber cu e asesinato aki, ta mesun famia di e señora cu a perde su bida e dia en cuenstion y esaki tabata un di e principal motibo, claro fuera di declaracion di e otro culpabel y demas evidencia, un punto cardinal cu huez den prome instante a haye culpabel den e caso aki. Akinan el a haya un castigo di 20 aña di prison y mirando cu e ta keda para riba su inocencia, el a dicidi pa apela y Hof a dicta sentencia y mas bien a aumenta esaki cu dos aña mas esta awo e mester bai sinta un castigo di prison di 22 aña. Manera ta conoci den Hof tres huez ta sinta y studia e caso y nan a yega na e conclusion cu e tipo di casonan aki ta condenabel y mas ainda mirando e lasonan familiar cu tin. Mester bisa si cu ainda e acusado tin chens pa bai Cassatie pero no ta conoci si e lo haci esaki. Mas cu claro tambe e acusado tin un suma di daño y perhuicio cu e mester bai paga na e famia di e señora asesina cu ta un suma di 146 mil Florin y si no cumpli cu esaki e lo mester sinta e dianan den prison tambe equivalente na e suma aki.