Desde di e detencionnan den casonan Avestruz, partido AVP, bou cual gobernacion e actonan a wordo cometi, a bin ta critica e funcionamento di Landsrecherche y Ministerio Publico (OM). E partido berde y su candidatonan a bin ta bisa constantemente cu tur esaki ta acto manipula y guia door di e partido geel. A wordo bisa cu Ministerio Publico no ta actua di forma consistente y ta partidario.
Esaki ta algo cu Hof no ta aprecia. Den un recien conferencia di prensa di Hof a bini pregunta riba e tema aki y unda cu a bini dilanti bon cla cu criticanan riba un di e podernan di Trias Politica no ta wordo aprecia.
Den un estado di derecho democratico tin separacion di podernan. Tin esun legislativo den man di Parlamento; tin ehecutivo (Gobierno cu ta encarga cu e maneho diario) y poder hudicial di Huesnan (y Ministerio Publico).
E idea di Trias Politica ta pa separa e tres podernan via di Constitucion y cada un ta vigila funcionamento di e otro.
Esaki ta funciona na Aruba, segun Hues mr. Debby Angela y Jacques Keltjeus (vicepresidente di Hof), a bisa recientemente. P’esey tambe no ta aproba e criticanan cu tin riba un di e podernan di e Trias Politica.
No por papia niun momento di persecucion politico, pasobra cada poder tin su tareanan y esun hudicial tin leynan cu nan mester mantene nan mes na dje, y banda di esaki na final un Hues ta evalua si a sigui tur procedura manera ley ta prescribi. “E ta fastioso cu como politico bo bay ataca un di e podernan ey. E ta duna e impresion cu e politico no ta confia e sistema di estado democratico y lo crea e sentimento cu e pueblo tampoco por confia den OM.”
Vicepresidente di Hof Jacques van Keltjeus a bisa cu como Hues nan mester mantene nan mes na leynan. Nan ta haya e casonan den nan man y ta trata esaki. Un hues no por expresa nan mes riba un caso. Tampoco por husga un caso di e mesun forma cu OM of Abogado ta mira un caso. Nan mester basa nan mes solamente riba ley.
El a bisa tambe cu un persona ta inocente te ora cu demostra lo contrario. Tur e procedura prome cu esey ta bay via di reglanan legal; durante huiszoeking tin un Hues presente; y detencion tambe ta wordo evalua riba criterionan legal. Si OM y Polis no cumpli cu esaki, no por sigui nan peticion. Pero tambe un hues ta evalua si tin suficiente base pa sigui mantene un hende deteni, teniendo cuenta cu diferente criterio. Un Hues ta controla a base di hermentnan legal loke cu presenta na dje.
Durante e audiencia lo evalua si un persona ta bira sospechoso pasobra tin suficiente prueba. Si e sospechoso no ta di acuerdo, e por bay Hof. “Rechtspraaki lo no mete nunca cu politica.”