Hof di Corte Superior no a dicta sentencia den e apelacion di Shannon Williams contra su condena di 17 aña di prison. Hof
MAS NOTICIA por a compronde cu Hof a dicidi cu e kier scucha e dos sospechosonan K. y A. cu tabata den e auto hunto cu Williams na momento cu e tiramento di Eddy Rincon Bravo a tuma lugar.
Diaranzon 3 di Juli 2024, den oranan di merdia, Hof di Corte Superior a bisa cu nan kier scucha e dos sospechosonan K. y A., kendenan tambe ta testigo.
ACUSADO TA PARA RIBA CU TA UN TIRO ACCIDENTAL
Luna pasa tratamento di e caso a tuma lugar caminda Procurador General (PG) a presenta e acusacion contra Shannon Williams ( S.W.) (23) cu riba 30 November 2022, el a tira mata Eddy Rincon Bravo (victima) ariba e caminda pa bay tanki di Savaneta. Tambe cu W. a horta e victima y tabatin un arma di candela. Ta asina cu W. a apela e sentencia y Hof a puntr’e pakico el a apela. El a bisa Hof cu el a haci malo pero no tabata su intension di mata. El a bisa cu loke a pasa tabata un accidente. Segun W. durante luchamento entre e y e victima, e arma a tira. Emociona, cu wowo yen awa. El a bisa Hof cu tur dia e ta pensa loke a pasa.
TIRAMENTO DEN AUTO
Durante tratamento di e caso Hof a mustra cu tabatin un discusion entre W. y Eddy pa e 50 florin cu W. a usa pa cumpra cocaine pa Eddy. Segun W., el a keda pleita cu Eddy pa e haya e 50 florin pa e por cumpra su marihuana. Na caminda pa e tanki e discusion a sigui y na dado momento W. a rabia y a surgi luchamento patras den e auto. Segun W., Eddy a saca un arma riba dje y e ora ey W. a purba kita e arma for di dje. E arma a cay abao den auto banda di Eddy. Eddy a coy e arma bek. A surgi otro luchamento caminda Eddy tabatin su man riba e loop y W. a gara e arma na e man. Na dado momento Eddy kier a bula for di e bentana di auto. Segun W., den e bulamento, e arma a tira y Eddy a resulta herida. W. a baha for di e auto y a bay purba yuda. Segun W., el a hala Eddy na banda di caminda y a purba carga Eddy, kende a bisa cu W. a tir’e y e no kier bay. E ora ey W. a subi den auto y K. y A. a bisa cu nan no ta hiba W. cas. Ariba caminda di brug di Tele Aruba, W. a tira e kruknan y slof di Eddy afor.
TESTIGONAN A DECLARA OTRO
Hof a bisa cu ta straño cu W. ta amigo di Eddy y e ta haci asina. W. a bisa Hof cu nada mester a sosode asina. Hof a mustra cu segun declaracion di e pareha K. y A., nan no a mira Eddy usa cocaina. A. no a mira Eddy cu arma. Ta ora Eddy a bula for di e bentana di auto, a tende un tiro. Nan a mira W. baha for di auto y a pidi Eddy pa e placa. W. a desmenti cu e tabatin arma cun’e. Hof a mustra cu K. a bisa cu el a mira W. saca un revolver preto for di su tas. Segun W., K. no por a mira kico tabata pasando pasobra e tabata stuur e auto. Na opinion di W., e unico momento cu K. por a mira W. cu e arma den man ta ora W. cu Eddy tabata luchando cu e arma. W. a bisa cu Eddy a cay pafor di e auto cu e arma y el a coy e arma benta den mondi. Hof a mustra cu K. a bisa cu W. tabata menaza Eddy cu e revolver y a dal’e cun’e na su cabez. Hof a bisa cu K. a declara cu W. a bay riba Eddy benta abao, listra den su saco di carson y coy placa bay cun’e. Segun W. e unico cos cu el a coy tabata e arma benta banda di Eddy y a bent’e den mondi. Segun W. esey tabata pa evita cu Eddy por yega na e arma. W. ta haya cu K. ta gaña pa tira culpa riba W.
VICTIMA A BISA TESTIGO KENDE A TIR’E Y HORT’E
Hof a mustra cu tin un señora cu ta biba banda unda e tiramento a sosode. E señora a bisa Polis cu el a mira kico a sosode y a scucha W. bisa Eddy: “mi ta bay mata bo”. W. a desmenti esaki. Hof a bisa cu despues cu e auto a core bay, e señora a bay serca Eddy y Eddy a bisa cu ta W. a tir’e y a bay cu 3 mil florin di dje. Hof a remarca cu K. a bisa cu a mira W. a busca den paña di Eddy y saca un stapel di placa y e señora a bisa cu Eddy a bisa cu W. a horta 3 mil florin di dje.
PG A EXIGI MAS CASTIGO
Na opinion di PG, ta legalmente proba cu W. a tira mata Eddy y a horta e placa cu Eddy tabatin. E ta haya W. culpable di a mata y ladronicia cu violencia cu consecuencia morto.
PG a bisa Hof cu pa e demandanan, e ta exigi pa aproba e tata su demanda di mas o menos 6 mil florin y daño inmaterial di 20 mil florin. El a exigi pa impone medida di pago y si W. no paga e lo mester bay 538 dia sera. Tambe PG a exigi pa aproba daño pa e mama cu ta algo mas di 4 mil florin, mas e daño inmaterial di 5 mil florin. PG a exigi pa pone medida di pago y si W. no paga e lo mester bay 158 dia sera. PG a mustra cu Hues a condena W. na 17 aña di prison. PG ta haya cu den Corte Superior, W. no ta tuma su responsabilidad. E ta culpa tur otro. PG exigi pa subi e castigo di 17 pa 19 aña di prison.
HOF KIER SCUCHA DOS TESTIGO
Dia 3 di Juli 2024, Hof a bisa cu e ta tuma un decision intermedio. Hof a dicidi cu tratamento di e caso no a caba. Hof kier scucha e pareha K. y A., kendenan tabata sinta dilanti den e auto mientras cu W. y Eddy tabata sinta patras den e auto. E interogacion aki lo ta dia 8 di October 2024, caminda Hof lo puntra K. y A. kico nan a mira.