AMSTERDAM, Hulanda- Hobennan na Hulanda ta uza hopi mas droga compara cu hobennan di otro paisnan Europeo. Den e categoria di 15 pa 34 aña, e uzo di xtc y amfetamina na 2015 na Hulanda tabata esun di mas halto na Europa.
Esaki segun un relato anual di e Centro Europeo pa Observacion pa droga y drogadiccion (EMCDDA) unda cu rapportan ta wordo publica tocante uzo di droga den paisnan Europeo.
Di homber y muhenan Hulandes, entre 15 y 34 aña cerca di 6.6% ta uza xtc. Esey ta hopi mas cu Irlanda (4.4%), cual ta number 2 ariba e lista. E promedio Europeo ta di 1.8%.
Xtc ta un di e droganan mas popular den e bida nocturno, vooral den clubnan cu musica trance of musica electronico. Esaki, segun investigadonan, ainda ta asina, pero tin indicacion cu paisnan unda xtc ta wordo uza, esaki ta popular tambe pafo di e ambiente festivo di e bida nocturno. Den e paisnan aki e droga ta wordo mas uza den e bida diario, manera den bar of den fiestanan di cas.
EMCDDA ta avisa pa un droga sintetico nobo, y mas poderoso cu ta aparece cu mas frecuencia. Aña pasa tabata tin 66 caso nobo. E relato ta indica tambe cu e cantidad di mortonan door di droga ta den ascenso. Na 2015 esaki tabata 8441 caso den e paisnan investiga, cual ta un aumento di 6% compara cu e aña anterior. Hulanda ta net mei mei cu 16 morto relaciona cu droga pa cada miyon habitante.
Banda di e partydrugs, e uzo di cocaina y cannabis tambe ta relativamente halto na Hulanda, unda e ta para na di 2 y di 6 luga ariba e lista.
Anualmente mas o menos 24 biyon euro ta wordo gasta den e comercio Europeo di droga.