E proyecto Earn Your Future a finalisa despues di dos luna y mester bisa cu e muchanan ta sumamente contento cu loke nan a siña. E proyecto aki su intencion ta pa duna muchanan di 6de klas basischool e conocimento necesario pa nan siña traha un budget, tuma desicionnan financiero riba nan mes y bira mas cauteloso con nan ta gasta nan placa. E aña aki a bishita alrededor di 15 scol y a duna les na mas of menos 700 mucha. Trahadornan di PwC ta participa bolunariamente pa duna les na e muchanan y asina amplia e conocimento di e hobennan riba e balor di placa.
Segun Edsel Lopez, kende ta partner di PwC Dutch Caribbean, a cuminsa cu e lesnan dos luna pasa na San Nicolas na St. Michael School y a caba na Noord na St Anna School. A enfoca e aña aki pa pasa den mas tanto bario posibel pa asina hobennan tur rond di nos isla haya e oportunidad pa tuma e lesnan aki. E lesnan a bay hopi bon y e muchanan a haya e chens di siña con pa anda cu placa y con pa balansa un budget. Di e forma aki e muchanan ta bay cas cu conocimento nobo cual nan por comparti cu nan mayornan y otro miembronan di famia.
Despues cu a cuminsa cu e proyecto Earn Your Future na 2014, PwC a ricibi varios peticion di diferente scol pa asina ripiti e programa cu ta consisti di 2 les y cada les ta dura 45 minuut. E lesnan ta interactivo y ta concientisa hobennan riba topiconan financiero. Considerando e exito di e proyecto, PwC ta evalua y ta den combersacion cu SKOA pa mira con ta bai ehecuta e projecto otro aña. Mirando e acogida na e scolnan y den pueblo, siguramente lo sigui cu e proyecto anualmente.
Edsel Lopez a finalisa bisando cu ta importante pa hobennan sa con pa anda cu un budget y mas chikito nan cuminsa, miho ekipa nan lo ta den futuro riba con pa maneha nan placa den un forma balansa.