Hobennan a lanta para awe: Wendrick Cicilia otro hoben profesional riba lista di AVP

Capacidad profesional, educacion moral y politico na cas y den organisacion boluntario, energia y motivacion sano y humildad pa sirbi ta loke partido AVP a presenta cu e candidato hoben Wendrick  Cicilia ayera tardi den Cas di Partido y riba medionan social. Den un discurso cu ta demostra profundidad di pensamento, caracter, moral y dedicacion, Wendrick Cicilia a presenta su mes na comunidad.

Ken ta Wendrck Cicilia?

Wendrick Cicilia ta un hoben, un di dos ruman morocho, cu ta bin di un famia grandi y un tradicion di hopi generacion den Partido di Pueblo Arubano AVP. Wendrick mes a conta cu e tabata tin problema pa caba scol basico, pero awe ta un hurista profesional gradu’a di Universidad di Aruba. E tin 25 aña. Banda cu el a lanta den un famia cu tabata hopi activo den politica pa hopi aña, Wendrick mes a bira miembro di Plataforma Hobennan Profesional (PHP), un organisacion di hobennan den partido AVP. Hunto cu su coleganan el a lanta e Tienda di Ley Aruba, cu ya pa algun aña ta duna sosten legal na ciudadanonan di menos recurso cu no por paga un abogado. Banda di su estudio na universidad, den e trabou di Tienda di Ley, e y su coleganan di PHP a haya hopi experiencia den asuntonan legal diario di ciudadanonan na Aruba.

AWOR TA TEMPO PA HOBENNAN

Sin descalifica niun hende, Wendrik a bisa bon cla cu hobennan profesional ta cla pa carga e responsabilidad cu nan generacion tin pa nan pais. Wendrick: ”Cada generacion nobo tin un responsabilidad pa cu su comunidad. Como hoben profesional cu conviccion y determinacion, mi ta convenci cu nos tempo ta Awor!”

Pa ilustra su intencion den politica Wendrick a splica con e ta wak politica: “Politica ta mas cu un metodo pa eherce y conserva poder, mas cu administracion di poder den un pais y sigur mucho mas cu un instrumento di critica, husga y condena. Den mi curason mi tin e conviccion cu politica tin un definicion mas profundo. Politica ta e lucha pa felicidad humano, e lucha pa crea of recupera prosperidad y felicidad pa cada ciudadano, y mas aun pa esnan mas vulnerabel den nos comunidad. E ta e lucha continuo pa crea un miho sociedad. Pa crea e condicionnan necesario pa cada ciudadano por florece y hiba un bida digno.” Ta obvio, Wendrick a bin pa sirbi su cas, Aruba!”

 

Comments

comments