CHICAGO, Merca – Un hoben di 19 aña na estado cu a disparce luna pasa a wordo haya morto den un cas na Chicago, segun autoridadnan a informa. Polis ta kere cu e muhe a wordo asesina y su baby, cu tabata den nace a wordo saca forsosamente for di su bariga.
Marlen Ochoa-Lopez tabata tin nuebe luna na estado ora cu el a disparce dia 23 di april. Su curpa a wordo haya e siman aki y causa di su morto ta strangulacion.
E baby ta den estado grave, polis a bisa.
E dia cu Ochoa Lopez a wordo raporta como desapareci, un yamada pa un yudansa pa un baby a bin for di e mesun adres na unda cu a haya su curpa.
“Nos ta kere cu el a wordo asesina y cu e baby a wordo saca forsosamente despues di e asesinato”, Anthony Guglielmi, vocero di polis di Chicago a bisa.
Tin acusacionnan pendiente contra di tres persona cu e detectivenan ta interogando, según e vocero di polis, Kellie Bartoli.
Crimen
Mi ta na sur di Chicago, si bo kier spera un siman mas, mi yiu muhe tin paña pa baby mucha homber cu nunca su yiu a uza”, Clarisa Figueroa, di 46 aña a skirbi ariba Facebook, na Marlen Ochoa.
Esaki tabata e combersacion unda cu nan a tira e hanzue na e hoben Hispano na estado cu a disparce na Chicago y despues di tres siman ta aparece morto den un dump, sin su baby. Autoridadnan a señala cu e muhe a invit’e pa su cas, gañando e cu e tabata kier a regal’e paña pa su yiu cu tabata den nace.
E detayenan di e crimen contra di e hoben ilegal ta impactante y a atrae e atencion di medionan di e pais completo. Figueroa y su yiu Desiree di 24 aña, a strangula Marlen cu’n kabel y despues a corta su bariga pa saca e baby. Loke ta mas aterador? E motivacion, aparentemente, tabata cu e muhe tabata kier a cria un yiu despues di dos aña cu su yiu adulto a fayece un morto natural.
Un yamada pa un recien naci
E dia cu Ochoa- Lopez a disparce, e Departamento di Bombero di Chicago a ricibi un yamada di un recien naci den peliger na e mesun adres unda cu a haya e curpa di e muhe.
Figueroa mas laat a yama 911 tur desespera pa pidi yudansa, door cu “su yiu” recien naci no tabata hala rosea. Ora cu personal di emergencia a yega, e mucha tabata blauw.
Nan a purba reanima e criatura y el a wordo transporta pa un hospital cercano, unda cu e ta den estado grave, segun autoridadnan.
E criatura a wordo hiba hospital hunto cu e muhe cu a bisa di ta e mama, segun Larry Langfold, vocero di e Cuerpo di Bombero.
Via testnan di DNA, a bin confirma cu e baby en cuestion di di Marlen. Su famia a ricibi e confirmacion di cu e baby recien naci ta yiu di Marlen, Jacobita Cortes, pastoor di su Iglesia Metodista Unida Adalberto Memorial na Chicago, caminda cu e famia a pidi yudansa.
Mientras, miembronan di e famia ta yora e hoben, pero tambe ta haci oracion pa e baby sobrevivi, segun vocero di famia.