Awe den oranan tempran di mainta Corte a dicta sentenci den e caso di un mucha homber menor di edad acusa di mata un persona riba e anochi di 31 di december pa prome di januari.
“Bo a mata un persona y bo ta castigabel,” Hues a bisa e hoben via di video call. Pero na mesun momento e Hues a mustra bon cla cu su mannan ta mara na loke ley ta prescribi.
E acusado M. a comete e delito na momento cu e tabatin 15 aña, pues menor di edad. Mas cu 12 luna, e no por dun’e. Loke si e por haci ta pone condicionnan.
Esaki ta nifica cu el a impone un castigo di 12 luna di cual 4 luna ta condicional (pues awo mester sinta 8 luna so), y dos aña di prueba. A pone bou guia di Reclassering pa maximalmente dos aña, unda cu e mester sigui tur nan ordonan. Banda di esaki, e mester paga famia di e victima 5200 florin pa gastonan di entiero.
Huez na momento di lesa e sentencia a expresa cu lamentablemente Aruba no tin un instituto pa pone e hobennan aki den dje. Pa mand’e Hulanda lo dura hopi tempo.
E castigo ariba menciona ta nifica cu den un par di siman e lo sali liber.