SAUDI ARABI – Un video publica riba internet pa un hoben, ta causando polemica na Saudi Arabia. Algun persona ta defende, mientras cu otronan a pidi pa e wordo aresta pasobra e ta aparece bisti cu un saya cortico y un blusa riba lombrishi mientras cu e ta cana den caya. Luganan noticioso vincula cu e Gobierno a publica dialuna, cu autoridadnan di e pais musulman aki ta studiando pa emprende accionnan contra e muhe pa viola e estricto codico local di bistimento.
Den e nacion aki, e muhenan mester uza den publico paña largo, conoci como abaya. E mayoria ta cubri nan cara y nan cabey cu un paña preto, aunke ta haci algun excepcion den casonan determina, principalmente cu representantenan di e Estado cu ta bishita e pais.
E video, comparti pa prome biaha riba Snapchat, ta mustra e hoben canando pa un fuerte historico bashi riba Ushaiager, un villa nort di e capital Riyad.
Despues a cuminsa na surgi hashtags riba Twitter na fabor y den contra di dje: algun pidiendo su aresto y otronan bisando cu e libertad di bistimento no mester ta un delito.
Ibrahim al-Munayif, un escritor Saudita cu mas 41 mil siguido riba Twitter, ta di opinion cu si autoridadnan permiti cu hende desobedece e leynan, lo bay tin caos.
Otronan ta defende comparando su caso cu bishita cu e presidente Mericano Donalt Trump a haci na Mei, ora cu su yiu muhe Ivanka y e prome dama Melania Trump, no a cubri cu nan cabes, ni a bisti e abaya, aunke si nan a uza prenda cu manganan largo y garganta halto.
E rednan social ta hopi popular na Saudi Arabia, pues nan a bira un espacio pa ventila e frustracionnan y calibra opinion publico.
Fuente: www.nacion.com