Dia 7 di December 2016 un hoben di 17 aña a tene un entrevista cu minister president. E hoben yama Giovanny Villamizar cu tin un entusiasmo hopi grandi den e parti di gobierno, a papia cu minister president Mike Eman tocante tema nan cu ta encera e hubentud di Aruba.
Giovanny Villamizar cu ta bay e scol Colegio San Antonio y ta den examenjaar a dialoga cu minister president su preocupacionnan cu e tin pa hubentud di Aruba y pa asina trece ideanan di con nos por premira e hubentud bay den un bon caminda y abstene nan mes for di tur maldad den futuro. Giovanny Villamizar a bisa cu e ta secretario tambe di e Fundacion Parlamento Hubenil Aruba y cu nan prioridad ta pa sostene derecho nan di mucha/hoben ariba tur tereno y durante nan reunionnan ta trata temanan cu tin di haber cu e hobennan den e comunidad di Aruba y nan desaroyo cu ta un etapa di “teenager” caminda cu hopi di nos hobennan ta experimenta of ta cay bou di mal influencia hopi liher.
Durante e dialogo aki Giovanny Villamizar a demostra tambe hopi interes ariba e parti di gobernacion di nos pais Aruba caminda cu el a laga sa cu den futuro probablemente e lo sigui e carera di politica ya cu su interes ta sumamente grandi desde cu e tabata mas chikito.
“Nos como hoben ta e futuro di mañan” e hoben a bisa. Giovanny Villamizar a sigui splica cu e etapa”hoben” ta e fundeshi di bo futuro caminda cu durante e etapa aki bo ta cuminsa na analisa y pensa kico bo lo kier bira of ki carera bo lo kier studia. E minister president a keda hopi orguyoso cu nos tin hobennan asina den nos comunidad y cu semper e lo sigui encurasha e hoben pa e sigui cu su meta cu e tin cu hopi interes den gobernacion di nos pais Aruba y vooral na un edad jong.. “Semper lo mi sigui traha pa e bienestar di nos hubentud”e hoben a bisa.