BUENOS AIRES, Argentina- E mucha muhe a mata su pareha den pleno via publico. El a tir’e dos biaha. Husticia a determina cu el a haci esaki di forma boluntario. E tribunal di Gualeguaychú, provincia di Entre Rios (Argentina), a condena e hoben Nahir Galarza, di 19 aña, pa a mata su pareha Fernando Pastorizzo na final di december 2017.
Husticia a determina cu ta trata di un “asesinato premedita” door cu ta trata di un persona cu kende e Galarza tabata mantene un relacion di pareha, segun e corant Perfil.
Durante e lectura di sentencia, e hurado a bisa cu “e hipotesis di cu el a tira su pareha di manera involuntario a keda destrui”. Esaki tabata e argumento di e derensa di Galarza, cu tabata insisti di cu no tabata tin niun relacion di pareha.
Huicio historico y polemico
Cu e sentencia aki, Galarza ta bira e muhe mas hoben di haya e pena maximo. Segun codigo penal local, e lo por recobra su libertad condicional una bes el a cumpli 35 aña di condena. Cu esaki, e lo por sali liber ora cu e tin 54 aña.
E hucio no a bay sin criticanan na fabor y en contra. “Nunca mi a wak un huicio bay asina lihe, teniendo na cuenta cu cada 20 hora un muhe ta muri na man di su pareha of ex pareha”, e actriz y escritora Malena Pichot a bisa.
Tabata tin criticanan pa e trato cu e medionan local a duna e proceso, cual a haya e nomber di “caso Nahir Galarza”, mientras cu ora ta trata di un feminicidio nan ta yama e caso pa e nomber di e victima y no e victimario.
Tabata tin otronan tambe, manera e diputado provincial, cu a cataloga di “ehemplar” e sentencia aki y a resalta e importancia di castiga violencia, “sin distincion di ken a haci’e”.
Fuente: RT Actualidad