DALLAS, Merca- E pashent tabata presenta ademas dolornan muscular y keintura.
Un hoben di Dallas, Texas (Merca) a bay dokter despues di cu un mainta el a lanta cu iritacionnan di cuero riba full su curpa, su cuero di cabes y torso. Despues el a comproba cu ta trata aki di un malesa transmiti sexualmente, segun un informe medico publica recientemente den e revista The New England Journal of Medicine.
E pashent di 20 aña a yega hospital di Texas University cu dolornan muscular, keintura y dolornan na su enkel, como tambe iritacion na henter su curpa. Despues di analis, e hoben a wordo diagnostica cu gonorrea. E pashent a indica na dokternan cu algun siman prome el a tene relacion sexual sin proteccion cu su pareha nobo.
Gonorrea por infecta tanto homber como muhe, provocando infeccinnan den e genital, e anus y garganta. E malesa aki di transmision sexual por causa complicacionnan grave si e no wordo trata, y por hasta resulta den infertilidad.
Ademas, e bacteria di e gonorrea ta capas di propaga su mes a trabes di e canal sanguineo di un persona cu no haya tratamento y ta infecta otro partinan di e curpa, causando dolor di curpa y iritacion di cuero, manera e caso di e hoben Mericano.
E sintomanan di e pashent en cuestion a baha cu’n tratamento cu antibiotico y despues di 3 luna “e tabata bon, sin iritacion di cuero ni tampoco dolor di curpa”.