Hopi biaha hobennan no sa e nificacion di un cantica, of ta tuma tur cos como un ‘joke’. Pero jokennan asina por tin consecuencianan grave y trece tercera persona den peliger pa motibo di jokenan sin sentido. Esaki tambe tabata e caso den e siguiente relato di polis:
Central di Polis ta ricibi un melding di cu lo tin un chauffeur di un auto KIA Rio color bruin ta coriendo iresponsabel. Tambe e chauffeur lo tabata tin un pistool di co’i hunga den su poder. Cu esaki e tabata spanta e automobilistanan door di bay ariba nan. Despues di esaki, informe ta drenta cu e auto lo a bay direccion di Flying Fishbone na Savaneta.
Patruya a bin para e auto na altura di e KNIPOOG Supermarket na Cura Cabay. E chauffeur N. a core tira e arma aki pafo di bentana.
Segun su declaracion, e tabata scuchando cantica di e rapper Curasoleño Dongo, cu ta conoci di traha canticanan fuerte, cu insinuacionnan di dobbel sinti y tambe di violencia. E tabata haci letranan di e cantica di Dongo, y a base di esaki e tabata haciendo joke cu e pistool. Pero cu nan no tabata kier problema. N., E. y D. a wordo pidi pa bay warda, y aki fiscal na warda a hala nan atencion na un manera poco duro, pero tabata pa nan mesun bon.